Japonia financon tri projekte në Kosovë

Qeveria e Japonisë në kuadër të ndihmës për Kosovën, do të financojë tri projekte të reja. Sipas një njoftimi, kontratat e donacionit në mes të institucioneve përfituese dhe Ambasadës së Japonisë në Vjenë do të përmbyllen sot më 7 mars, 2011, në Zyrën ndërlidhëse japoneze në Prishtinë nga Qeveria e Japonisë.

Ky lloj i ndihmës, është një vazhdimësi nga Qeveria japoneze, e cila ka për qëllim të promovojë zhvillimin shoqëror dhe ekonomik në Kosovë. Projekti i parë ka të bëjë me instalimin e pajisjeve mjekësore në Spitalin Rajonal të Ferizajt për përdorim në sallën e operacionit me vlerë 58.200 euro. Në këtë spital trajtohen më se 50.000 njerëz në vit, ndërsa ai arktualisht përballet me vështirësi të mëdha në kryerjen operacioneve ortopedike për shkak të mungesës së pajisjeve të nevojshme. Projekti tjetër ka të bëjë me renovimin e shkollës fillore “7 Marsi” në Suharekë, me vlerë 53.812 euro.

Shkolla është në një situatë të vështirë për të siguruar ambient të përshtatshëm për arsim për shkak të objektit të vjetër shkollor. Ndërsa projekti i tretë është për pajisjen e Qendrës së Mjekësisë Familjare në Lipjan me aparatura mjekësore dhe një autoambulancë”, me vlerë 41.350 euro. Qendra kryesore e mjekësisë familjare e Lipjanit ka departamentin e shëndetit familjar, sektorët e gjinekologjisë, pulmologjisë, radiologjisë dhe stomatologjisë si institucion primar mjekësor. Qendra vizitohet nga rreth 13.000 njerëz ne vit, duke përfshirë banorët etnikë serbë.