Italia përgatitet të transferojë emigrantët në Gjadër – në listë edhe shqiptarë

Ministria e Brendshme e Italisë ka nisur përgatitjet për transferimin e një grupi emigrantësh në kampin e ngritur në Gjadër të Shqipërisë, sipas raportimeve të gazetës prestigjioze italiane La Repubblica.

Këtë herë, ndryshe nga më parë, bëhet fjalë për emigrantë që nuk do të rikthehen menjëherë në Itali, por do të qëndrojnë në Shqipëri në pritje të riatdhesimit, transmeton albinfo.ch.

Sipas të njëjtit burim, bëhet fjalë për persona që aktualisht mbahen në qendrat italiane të riatdhesimit, të cilat tashmë kanë arritur kapacitetin maksimal, pas një direktive të fundit të Ministrisë së Brendshme. Departamenti i Lirive Civile dhe Imigracionit, i drejtuar nga prefektja Rosanna Rabuano, është duke përpiluar listën e atyre emigrantëve që konsiderohen më të përshtatshëm për t’u dërguar në Shqipëri.

Në mesin e shtetësive të përfshira në këtë listë janë tunizianë, egjiptianë, marokenë dhe shqiptarë. Në mënyrë paradoksale, La Repubblica thekson se edhe emigrantët e parregullt shqiptarë mund të përfundojnë në kampin në Gjadër, meqë kthimi i tyre në vend do të ishte më i lehtë dhe më pak i kushtueshëm për Italinë, transmeton albinfo.ch.

Për këta shtetas, qëndrimi në Shqipëri mund të përfundojë me lirimin në territorin shqiptar, ndërsa për të tjerët, sipas marrëveshjes ndërqeveritare mes Romës dhe Tiranës, kthimi në Itali është i detyrueshëm përpara nisjes së procedurave të riatdhesimit.

La Repubblica thekson se Italia duhet të forcojë marrëveshjet ekzistuese për të shmangur që operacioni të kthehet në një “efekt bumerang”, në rast se emigrantët qëndrojnë për muaj të tërë në Shqipëri pa u kthyer në vendet e origjinës, transmeton albinfo.ch.