PISA 2025: Shqipëria shënon rezultatet më të mira në rajon

Nxënësit shqiptarë përmirësojnë rezultatet në matematikë, shkencë dhe lexim, duke renditur Shqipërinë të parën në rajon në dy prej tri fushave të vlerësimit

Shqipëria ka shënuar përmirësim të ndjeshëm në rezultatet e testit ndërkombëtar PISA 2025, duke regjistruar performancën më të mirë në rajon në shkencë dhe lexim, përcjell albinfo.ch.

Sipas të dhënave të publikuara nga OECD, Shqipëria ka marrë 433 pikë në matematikë, 435 pikë në shkencë dhe 408 pikë në lexim.

Rezultatet e publikuara tregojnë se Shqipëria renditet e para në rajon në shkencë, duke lënë pas Serbinë, Greqinë, Malin e Zi, Bullgarinë, Maqedoninë e Veriut dhe Kosovën.

Një rezultat i ngjashëm është shënuar edhe në lexim, ku Shqipëria po ashtu renditet e para në rajon. Ndërkohë, në matematikë, Shqipëria e ndan pozitën e parë me Malin e Zi.

Megjithatë, pavarësisht përmirësimit të rezultateve, Shqipëria vazhdon të ketë një hendek të konsiderueshëm krahasuar me mesataren e vendeve anëtare të OECD-së.

Mesatarja e OECD-së në matematikë është 463 pikë, në shkencë 482 pikë dhe në lexim 461 pikë.

Një prej dallimeve më të dukshme vërehet te përqindja e nxënësve që arrijnë të paktën nivelin bazë të aftësive, të njohur si Niveli 2.

Rezultatet e PISA-s ofrojnë një pasqyrë të performancës së nxënësve dhe shërbejnë si një prej treguesve ndërkombëtarë për vlerësimin e cilësisë dhe rezultateve të sistemeve arsimore./Albinfo.ch

---