Azilkërkuesit, të mirëpritur në Medel!

Në një mbledhje informative asnjëri nga 400 qytetarët e pranishëm të komunës nuk ka bërë ndonjë vërejtje rreth hapjes së qendrës për strehimin e azilkërkuesve

Në komunën e vogël Medel të kantoit Graubünden, nga fillimi i qershorit do t`i hapë dyert një qendër e re për strehimin e azilkërkuesve. Dhe, për ndryshim nga vendet tjera ngado në Zvicër, ku banorët protestojnë kundër hapjes së qendrave të tilla, qytetarët e Medelit nuk kanë asgjë kundër. Ata, madje, i gëzohen kësaj qendre që do të vendoset në strehimoren nëntokësore të ushtrisë.

Në një mbledhje informative të mbajtur javën e kaluar, asnjëri nga 400 qytetarët e pranishëm të komunës nuk ka bërë ndonjë vërejtje rreth kësaj çështje, shkruan “Südostschweiz”. Sipas kryetarit të komunës, Peter Binz, popullata këtu është e gatshme për të pritur azilkërkuesit.

Një faktor pozitiv me këtë rast është se azilkërkuesit do të mund te kryejnë punë të dobishme: Komuna ka përpiluar një program angazhimi për ta, që përfshin punën në pyll, në fusha dhe në shtigjet për shëtitje. Një angazhim i tillë, siç ka treguar përvoja nga komunat tjera, pritet mirë jo vetëm nga vendësit por edhe nga vetë azilkërkuesit. Veç kësaj, për banorët e rinj të Medelit do të jetë në dispozicion edhe salla e sportit dhe fusha e futbollit.

Kjo mikpritje për azilkërkuesit megjithatë është e kufizuar: qendra e tyre në lartësinë mbidetare prej 1900 metrash do të mbyllet sapo të bjerë dëbora e parë.