Albert Bunjaku, kapiten i St. Gallen

Sulmuesi kosovar, Albert Bunjaku, që nga sezoni i ri, i cili ka filluar në ligën zvicerane, është emëruar kapiten i ekipit futbollistik FC St Gallen. Ai ndihet i lumtur për këtë dhe shpreson që së bashku me ekipin të kenë një sezon të mbarë: “Jam shumë i lumtur dhe ndihem krenar të jem kapiten i një ekipi të mrekullueshëm”, ka thënë Bunjaku për mediet zvicerane, përcjell albinfo.ch.

Para se të kthehej në Zvicër, Bunjaku ka luajtur për SC Paderborn, Rot –Weiss Erfurt, Nuremberg dhe Kaiserlautern. Jo gjithmonë i ecën mbarë, por dëshira e madhe për të luajtur futboll e bëri që të mos ndalet. Kohë të vështira sidomos ai i kaloi në Paderborn, ku pastaj mbeti edhe pa punë.

Pas aventurës së tij në bundësligën gjermane, që nga viti i kaluar Bunjaku është rikthyer sërish në Zvicër. Sulmuesi i përfaqësues së Kosovës kalimin në St. Gallen e sheh si avantazh në karrierën e tij. “Kthimi im në Zvicër nuk është një hap prapa, por një hap para dhe shpresoj që unë në një të ardhme të afërt të mund të kontribuoj edhe më shumë për ekipin”, ka thënë Bunjaku.

Albert Bunjaku kapiten i skuadrës ishte edhe gjatë viteve 2012-2013 të Kaiserlautern.
Ndërkohë gjatë karrierës së tij futbollisti gjilanas ka luajtur edhe për përfaqësuesen e Zvicrës, ku mori pjesë edhe në kampionatin botëror 2010 të zhvilluar në Afrikën jugore, kurse nga viti 2014 është lojtar i përfaqësueses së Kosovës.