Zvicra, 1.12 miliard për kulturën

Pjesën më të madhe, 253. 9 milionë franga e merr filmi ndërsa me 210.9 milionë franga, në vendin e dytë është fondacioni kulturor Pro Helvetia

1.12 miliard franga “i rëndë” është buxheti që Qeveria Federale ka ndarë për kulturën për periudhën 2016-2020. Në krahasim me periudhën paraprake bëhet fjalë për një rritje prej mesatarisht 3.4 për qind në vit.
Këtë buxhet e ka miratuar të martën Dhoma Nacionale e Parlamentit të Zvicrës.

Pjesën më të madhe të këtij buxheti, 253. 9 milionë franga e merr prodhimtaria e filmit, ndërsa me 210.9 milionë franga, në vendin e dytë është fondacioni kulturor Pro Helvetia, njofton srf.ch. Muzeu Nacional i Zvicrës për periudhën e përmendur do të marrë nga qeveria 160.6 milionë franga, transmeton albinfo.ch. Për mbrojtjen e monumenteve dhe përkujdesjen për to, qeveria ka ndarë 132.6 milionë franga ndërsa shkollat zvicerane jashtë vendit do të subvencionohen me 110.1 milionë frang.

Në prezantimin që ministri Berset, në resorin e të cilit bie edhe kultura, ka bërë para deputetëve ka theksuar se kultura në Zvicër përbën një degë të rëndësishme ekonomike e cila merr pjesë me tre për qind në brutoproduktin vendor dhe punëson 260 mijë njerëz.