Më shumë se 100 makina janë bllokuar në magjistralen Kërçovë- Strugë si pasojë e reshjeve të mëdha të borës. Bllokimin e ka shkaktuar një kamionë, i cili ka ngecur në mes të rrugës, ndërsa më pas raportohet se kanë rrëshqitur edhe disa vetura dhe e kanë bërë rrugën të pakalueshme. 

Kjo gjendje, sic raporton INA, ka ndodhë në fshatin Arbinovë në hyrje të rrugës që çon për Strugë dhe Ohër.

Një kamion i ndërmarrjes “Rruget e Maqedonisë” në tentimin për të zhbllokuar rrugën, gjithashtu ka ngelur i bllokuar në borë, për shkak të reshjeve dhe sasisë së madhe të borës. Kjo ndërmarrje ka theksuar se po ndërmerre të gjitha masat për normalizimin e komunikacionit. Por, bllokada pritet të vazhdojë edhe për disa orë, për shkak të reshjeve intensive të borës.

Udhëtarë që kanë ngelur në makinat e apelojnë që sa më shpejt të zhbllokohet rruga.

“Ne presim që sa më shpejt të hapet rruga, sepse po mbetemi edhe pa karburant dhe se situata do të bëhet edhe më e vështirë. Apelojmë që sa më shpejt të ndërhyhet dhe të zhbllokohet rruga, përndryshe bllokada po bëhet edhe më e rëndë dhe se ka nisur ngrica dhe temperaturat e ulëta”, ka thënë një udhëtarë i mbetur në kolonë.

Ndryshe, reshjet e pandërprera të borës kanë shkaktuar vështirësi në qarkullim në disa zona në Koosvë, Maqedoni dhe Shqipëri. Në orët e mbrëmje u raportua për mbylljen e rrugës Librazhd-Qafëthanë, ndërsa në Kosovë disa rrugë malore janë të mbyllura, përfshirë edhe atë Pejë-Kullë-Rozhajë.