Finlanda vazhdon përkrahjen për Ministrinë e Diasporës

Ministri kosovar i Diasporës, Valon Murati, priti sot të ngarkuarën me punë të Ambasadës së Finlandës në Kosovë, Anne Meskanen

Ministri i Diasporës, Vaon Murati e falënderoi ambasadoren Meskanen për ndihmën që Qeveria finlandeze i ka dhënë Ministrisë që e udhëheq ai  së pari në përpilimin e Strategjisë për Diasporën dhe Mërgatën 2013-2018, procesin e hartimit të regjistrit të diasporës dhe mërgatës, si dhe në projektin e rrjetëzimit të bizneseve të diasporës, duke u shprehur i gatshëm që këtë bashkëpunim të mirëfilltë ta vazhdojë edhe në të ardhmen në nivel edhe më të lartë, posaçërisht në sjelljen e përvojës finlandeze dhe diasporës sonë në Finlandë, në sistemin e arsimit publik. Meskanen, duke i uruar ministrit Murati detyrën si Ministër i Diasporës, e njoftoi për projektet, të cilat Qeveria finlandeze është duke i mbështetur në Kosovë.

“Qeveria Finlandeze, konkretisht Ministria e Punëve të Jashtme e ka vendosur si prioritet çështjen e të drejtave të njeriut. Jemi të përkushtuar që së bashku me Ministrinë e Diasporës, përveç çështjeve që lidhen me diasporën, të punojmë edhe në fusha të tjera”, tha znj. Meskanen. Ajo u zotua se bashkëpunimi do të thellohet edhe më shumë në të ardhmen.