Hyn në fuqi marrëveshja e romingut mes shteteve të Ballkanit perëndimor

Nga dita e sotme ka hyrë në funksion marrëveshja e romingut mes shteteve të Ballkanit perëndimor, përcjell albinfo.ch.

Lajmin e ka bërë të ditur ministri i Zhvillimit Ekonomik në Kosovë, Valdrin Lluka.

Ai ka bërë të ditur se nga sot qytetarët mund të komunikojnë me çmime mbi 90% më të lira në tërë vendet e Ballkanit perëndimor, përfshirë Shqipërinë, Maqedoninë, Malin e Zi, Bosnjën dhe Serbinë.

“Nga sot, tarifat janë zbritur drastikisht, por brenda 2 vjetëve do të eliminohen tërësisht (korrik 2021). Pra, nga sot, kudo që jeni në njërin nga shtetet e lartpërmendura, ju mund të bëni thirrje për 15 cent për minutë, mund të pranoni thirrje për 4 cent për minutë, mund të dërgoni mesazh për 4 cent dhe mund të përdorni internet për 4 cent për MB”, ka njoftuar Lluka përmes një shkrimi në Facebook.

Marrëveshja për heqjen e çmimeve të shërbimit të romingut ndërmjet vendeve të Ballkanit Perëndimor, u nënshkrua më 4 prill të këtij viti në Beograd, nga ministri Lluka.

https://www.facebook.com/valdrinlluka/photos/a.115893315764764/353586778662082/?type=3&theater