Mbahet mesha e parë në Katedralen e Parisit, pas zjarrit të madh

KEYSTONE/AP Photo/Thibault Camus

Kryepeshkopi i Parisit, Michel Aupetit, dje ka mbajtur meshën e parë në katedralen e Parisit “Notre Dame” pas zjarrit të 15 prillit, që dëmtoi një pjesë të katedrales.

Siç raporton Euronews.com, vetëm 30 njerëz u lejuan të marrin pjesë në meshë. Sipas Dioqezës Katolike të Parisit, kjo u bë për arsye sigurie. Rreth 15 prej tyre ishin priftërinj, përfshirë edhe kryepeshkopin dhe peshkopin ndihmës, Philippe Marsset, përcjell në shqip albinfo.ch.

“Ishte një moment emocional, sidomos për faktin se shumica e pjesëmarrësve në meshë punojnë në katedrale. Është shtëpia e tyre”, citohet të ketë thënë kryepeshkopi në një konferencë shtypi.

Kryepeshkopia e Parisit ka konfirmuar për Euronews se personat që morën pjesë në meshën e së shtunës kanë veshur helmeta të forta.

Përndryshe, katedralja gotike 850-vjeçare u përfshi nga zjarri më 15 prill të këtij viti. Zjarri dëmtoi sidomos kulmin e katedrales. Pas këtij incidenti, kompani, shtete dhe individë të ndryshëm grumbulluan miliarda dollarë për renovimin e katedrales.