Nga 24 vjet burg në pafajësi, rasti i gjeneralit kroat Ante Gotovina

Gjenerali kroat Ante Gotovina ishte dënuar fillimisht me 24 vjet burg nga Tribunali i Hagës, por një vit e gjysmë më vonë Dhoma e Apelit e rrëzoi vendimin dhe e shpalli të pafajshëm.

Rasti i ish-gjeneralit kroat Ante Gotovina mbetet një nga rastet më të njohura të Tribunalit Penal Ndërkombëtar për ish-Jugosllavinë, ku një dënim i rëndë i shkallës së parë u përmbys në apel.

Më 15 prill 2011, Dhoma Gjyqësore e Tribunalit e shpalli Gotovinën fajtor për krime kundër njerëzimit dhe shkelje të ligjeve ose zakoneve të luftës, të lidhura me operacionin ushtarak “Stuhia” të vitit 1995. Ai u dënua me 24 vjet burg, ndërsa gjenerali Mladen Markač u dënua me 18 vjet, transmeton albinfo.ch.

Megjithatë, më 16 nëntor 2012, Dhoma e Apelit e Tribunalit e ndryshoi vendimin. Me shumicë votash, ajo rrëzoi dënimet ndaj Gotovinës dhe Markačit, i shpalli të pafajshëm dhe urdhëroi lirimin e tyre të menjëhershëm.

Dhoma e Apelit konstatoi njëzëri se shkalla e parë kishte gabuar në përdorimin e kriterit sipas të cilit goditjet e artilerisë më shumë se 200 metra larg objektivave të konsideruara legjitime merreshin si dëshmi të sulmeve të paligjshme. Shumica e gjyqtarëve më pas arriti në përfundimin se nuk ishte vërtetuar se sulmet e urdhëruara nga Gotovina dhe Markač ishin të paligjshme dhe rrëzoi përfundimin për ekzistencën e ndërmarrjes së përbashkët kriminale të konstatuar nga shkalla e parë.

Vendimi i Apelit nuk ishte unanim. Tre nga pesë gjyqtarët mbështetën përfundimin që çoi në pafajësinë e Gotovinës dhe Markačit, ndërsa gjyqtarët Carmel Agius dhe Fausto Pocar kundërshtuan vendimin e shumicës.

Me vendimin e 16 nëntorit 2012, Gotovina dhe Markač u liruan menjëherë, ndërsa pafajësia e tyre në apel përbën vendimin përfundimtar të Tribunalit në këtë çështje

---