Vera e vitit 2026 ka qenë më e nxehta e regjistruar ndonjëherë në Zvicër, duke shkaktuar rreth 1,257 viktima si pasojë e temperaturave të larta. Të moshuarit mbi 75 vjeç përbëjnë grupin më të prekur, ndërsa bilanci i viktimave është ndër më të rëndët që nga vera e vitit 2003.
Sipas vlerësimeve të publikuara nga Instituti Zviceran për Shëndetin Tropikal dhe Publik (Swiss TPH), temperaturat ekstreme gjatë periudhës maj–gusht 2026 kanë shkaktuar rreth 1,257 vdekje në Zvicër, duke përfaqësuar 5.5% të të gjitha vdekjeve të regjistruara gjatë këtyre katër muajve.
Të dhënat tregojnë se vera e këtij viti ka qenë më e nxehta që nga fillimi i matjeve meteorologjike në Zvicër, duke tejkaluar edhe temperaturat rekord të vitit 2003. Pasojat në shëndetin publik kanë qenë veçanërisht të rënda, sidomos për grupmoshat më të ndjeshme.
Rreth 85% e viktimave të lidhura me temperaturat e larta ishin persona të moshës 75 vjeç e lart. Ekspertët theksojnë se të moshuarit janë më të rrezikuar nga valët e të nxehtit, veçanërisht kur temperaturat e larta vazhdojnë për disa ditë radhazi, transmeton albinfo.ch.
Sipas analizës, afërsisht 70% e vdekjeve të lidhura me vapën u atribuohen ditëve me temperatura mesatare prej të paktën 25 gradë Celsius. Nga këto, 485 vdekje lidhen me ditët e nxehta, ndërsa 400 me ditët jashtëzakonisht të nxehta, kur temperatura mesatare ditore arrinte ose tejkalonte 27 gradë Celsius.
Instituti Swiss TPH vlerëson se temperaturat e larta vazhdojnë të përbëjnë rrezikun natyror që shkakton më së shumti viktima në Zvicër. Ekspertët paralajmërojnë se, me rritjen e shpeshtësisë së verave të nxehta, do të jetë e nevojshme të forcohen masat për mbrojtjen e shëndetit publik dhe veçanërisht të personave më të cenueshëm.
Megjithatë, bilanci aktual mbetet paraprak, pasi nuk përfshin muajin shtator, gjatë të cilit gjithashtu janë regjistruar temperatura jashtëzakonisht të larta.
Një raport përfundimtar, me të dhëna më të hollësishme për viktimat sipas grupmoshave, rajoneve dhe kantoneve, pritet të publikohet në pranverën e vitit 2027.
