Trump kundërshton ngadalësimin e zhvillimit të AI: “Kush fiton në Inteligjencën Artificiale, fiton”

(AP Photo/Luis M. Alvarez)

Presidenti i Shteteve të Bashkuara, Donald Trump, ka kundërshtuar idenë për ngadalësimin e zhvillimit të modeleve të avancuara të Inteligjencës Artificiale, duke theksuar se SHBA-ja nuk duhet të humbasë avantazhin ndaj Kinës në këtë fushë.

Trump deklaroi se Shtetet e Bashkuara aktualisht kanë epërsi në teknologjinë e AI-së dhe se ruajtja e këtij pozicioni është një interes strategjik për vendin.

“Ne kryesojmë ndaj Kinës në AI. Jemi vendi më i avancuar në botë dhe dua që të vazhdojmë të jemi të tillë, sepse kush fiton në AI, fiton”, u shpreh Trump.

Deklaratat e presidentit amerikan vijnë në një kohë kur drejtues të disa prej kompanive më të mëdha të teknologjisë kanë shprehur shqetësime për ritmin e zhvillimit të Inteligjencës Artificiale.

Drejtuesi i Anthropic, Dario Amodei, ka argumentuar se përmirësimi i aftësive të modeleve të AI-së duhet të zhvillohet me më shumë kujdes. Edhe drejtuesi i OpenAI, Sam Altman, ka shprehur mbështetje për masa që do të mundësonin kontroll më të madh mbi ritmin e zhvillimit të teknologjisë. Në të njëjtën linjë është shprehur edhe Elon Musk, drejtuesi i xAI.

Trump nuk e ka përjashtuar vendosjen e masave të sigurisë për Inteligjencën Artificiale, por ka paralajmëruar se kufizimi i zhvillimit të saj mund të dobësojë pozitën e SHBA-së në konkurrencën teknologjike me Kinën.

Debati është shtrirë edhe në Kongresin amerikan. Kryetari i Dhomës së Përfaqësuesve, Mike Johnson, ka deklaruar se zhvillimi i AI-së kërkon masa sigurie, por ka paralajmëruar se Kongresi duhet të shmangë ndërhyrjet e nxituara që mund të dëmtojnë avantazhin amerikan.

Përplasja mes kërkesave për zhvillim të shpejtë dhe nevojës për rregullim e siguri pritet të mbetet një nga debatet kryesore në politikën amerikane të teknologjisë.