80 për qind të grave preferojnë mbiemrin e burrit!

Madje edhe qytetet e mëdha, ku supozohet shkallë më e lartë e emancipimit të femrës, si metropoli i Zvicrës, Cyrihu, nuk bëjnë përjashtim nga ky rregull

Përkundër faktit se ligji i ri përkatës stimulon ruajtjen e mbienmit të vajzërisë, një shumicë e madhe e grave në Zvicër parapëlqejnë t`i përmbahen traditës, pra të marrin mbiemrin e bashkëshortit. Këtë e tregon një sondazh i gazetës „Schweiz am Sonntag“ i realizuar me zyrat e gjendjes civile në gjithë Zvicrën.

Ka qenë interesante se madje edhe qytetet e mëdha ku supozohet shkallë më e lartë e emancipimit të femrës, si metropoli i Zvicrës, Cyrihu, nuk bëjnë përjashtim nga ky rregull.

Kështu, shefi i zyrës civile të Cyrihut, Roland Peterhans ka thënë se 80 për qind e çifteve gjegjësisht grave, përcaktohen për mbiemrin e burrit si mbiemër familjar. Një përqindje e ngjashme me atë të Cyrihut, fjala vjen, është shënuar edhe në lokalitetin Olten-Gösgen.

Në Chur të Graubündenit, sipas sondazhit, është shënuar përqindja më e lartë, gjegjësisht 90 për qind e çifteve që preferojnë mbiemrin e burrit. Ndërsa pak më e ulët, 75% është përqindja në Basel-Stadt dhe në qytetin Baden të kantonit Aargau. Në këtë të fundit, zyra e gjendjes civile ofron shifra konkrete: nga 84 çiftet e kurorëzuara në mes të janarit dhe prillit, 62 kanë vendosur të mbajnë mbiemrin e bashkëshortit.