Zviceranët zvogëlojnë konsumimin e mishit

Ata kanë konsumuar gjatë vitit 2012 51.72 kilogramë mish ndërsa në vitin paraprak mesatarja ishte 53.7 kg

Të gjithë zviceranët marrë mesatarisht, (në llogaritjen e mesatares përfshihen edhe foshnjat dhe vegjetarianët!) kanë konsumuar gjatë vitit 2012 nga 51.72 kilogramë mish. Në vitin paraprak mesatarja ishte 53.7 kg, ka bërë të ditur të enjten federata zvicerane prodhuesve të mishit (SFF).

Por statistikat flasin për një konsum të përgjithshëm prej 421.018 tonelata mishi, që është për 3.5 për qind më shumë se mesatarja e dhjetë viteve të fundit.

Ndërsa shkaktarë për rënien e konsumimit të të gjitha llojeve të mishit, përfshirë edhe peshkun, gjatë vitit të kaluar, sipas SFF është praktika e blerjes jashtë vendit. Pjesërisht në këtë zvogëlim ka ndikuar edhe gjendja ekonomike. Kjo tregohet ehde nga statistika sipas të cilës konsumimi i mishit në restorante ka rënë për 5 për qind ndërkohë që nëpër familje ka shënuar një ngritje prej 1 për qind.

Sikurse edhe më parë, zviceranët edhe gjatë vitit 2012 më së shumti kanë konsumuar mish derri, gjegjësisht 23.54 kilogramë për person. Në radhë jen mishi i pulës (11.31 kg) dhe ai i gjedheve (11.06 kg.)