Benzina do të kushtojë 5 franga?!

Kryetari i Economiesuisse, Wehrli: "Ne po sillemi në mënyrë jo ekologjike me benzinën për shkakun se kjo nuk po na kushton asgjë",

Kryetari i Economiesuisse, dhomës ekonomike të Zvicrës, Rudolf Wehrli ka nxitur debatin për një shtrenjtim të madh të çmimit benzinës. “Ne po sillemi në mënyrë jo ekologjike me benzinën, për shkakun se kjo nuk po na kushton asgjë”, ka thënë ai dhe ka shtuar: “çmimi i benzinës do të duhej të ngrihej në 5 franga litri”, ka thënë ai, duke shkaktuar reagime të ashpra në opinionin zviceran.

Ndërkohë që VCS (Klubi për Komunikacion i Zvicrës), që angazhohet për më shumë komunikacion publik e ka pritur këtë propozim, partitë e djathta janë shprehur të pakënaqura. “Wehrli nuk e ka idenë se si mendon populli”, ka thënë deputeti nacional nga SVP-UDC-ja, Walter Wobmann, i cili është bërë i njohur për kundërshtimin që i ka shpallur ngritjes së çmimit të vinjetës së autostradave nga 40 në 100 franga.

“Në rast se do të ngrihej çmimi i benzinës në 5 franga, ne do të ktheheshim në kushtet e mesjetës. Atëbotë, shtresa e lartë shfrytëzonte kuajt. Ndërsa tash ajo duket se i dëshiron autostradat vetëm për vete”, ka thënë Wobmann.

Edhe në Federatën Zvicerane të Tregtisë reagojnë me kundërshtim. “Kryetari i Economiesuisse është evidente se po i nënshtrohet logjikës së të gjelbërve”, ka thënë drejtori Hans-Ulrich Bigler.

Ndryshe nga transporti publik i cili me më shumë se 50 për qind financohet nga shteti, rrugët vetëfinancohen, ka thënë ai.