1 miliard franga për autostrada

Qeveria e Zvicrës planifikon zgjerimin e rrjetit të rrugëve nacionale në vend

Rreth një miliard franga do të investohen për realizimin e këtij projekti. Qeveria e ka në plan të investojë në mes të Härkingen dhe Luterbach (SO), mes Winterthurit dhe Andelfingen (ZH) dhe në mes të Meyrin / Vernier dhe Le Vengeron (GE).

Një total prej 5.5 miliardë tashmë janë në dispozicion për zgjerimin e rrugëve nacionale. Ndërkohë janë lejuar 1.4 miliardë në implementimin e projekteve të infrastrukturës rrugore.

Zyra Federale për Rrugët (Astra) në një deklaratë për media ka bërë të ditur se 430 kilometra të rrugëve nacionale do të mbingarkohen deri në vitin 2030, nëse nuk ndërmerren masa për zgjerimin e tyre. 

Njëri ndër shkaqet thuhet të jetë rritja e qarkullimit rrugor.

Zonat më problematike sa u takon kolonave janë ato në autostradën A1, ndërmjet Gjenevës dhe Lozanës, si dhe ndërmjet Bernës dhe Winterthurit dhe A2 në zonën e Bazelit. Konsultimi rreth projekteve të infrastrukturës rrugore do të zgjasë deri më 7 gusht 2013.