Punëdhënësit kundër iniciativës 1:12

Po votuan punëmarrësit për iniciativën 1:12 ata “presin degën mbi të cilën rrinë”, thuhet në komunikatën e SAV

Punëdhënësit zviceranë janë shprehur qartë kundër iniciativës 1:12, me të cilën kërkohet nivelizimi i pagave respektivisht zvogëlimi i dallimeve në mes të tyre. Bartës të iniciativës janë Juso (socialistët e rinj) dhe ata dëshirojnë që proporcioni në mes të pagës më të vogël dhe asaj më të madhe në një ndërmarrje të mos jetë më shumë se 1:12.

Federata Zvicerane e Punëdhënësve (SAV) përmes një komunikate ka konstatuar se edhe vetë punëtorët punëmarrësit) përfitojnë nga një Zvicër e fuqishme financiarisht. Kjo fuqi, sigurish, sipas tyre është mundësuar edhe përmes stimulimit të menaxherëve me paga të mëdha.  

Sipas SAV shkalla e ulët e papunësisë në Zvicër, ndihmat e larta sociale dhe pagat e larta të punëtorëve janë rezultat i gjithë kësaj. Madje, punëdhënësit thonë se, në krahasim ndërkombëtar dallimi në mes të pagave më të larta të menaxherëve dhe më të ulëtave të punëtorëve, në Zvicër është më i vogël.

Një shkurtim i madh i pagave super të larta, ashtu siç e kërkon iniciativa e Juso-s do të prodhonte si rezultat një rënie të madhe të kontributeve tatimore dhe rrjedhimisht edhe të kontributeve për sigurimet sociale, thonë në SAV. Dhe këto efekte, në gjendjen çfarë është sot, shkojnë në radhë të parë në favor të personave me të ardhura të ulëta dhe të mesme.

Po votuan punëmarrësit për iniciativën 1:12 ata “presin degën mbi të cilën rrinë”, thuhet me fjalë tjera në komunikatë.

Sipas SAV, partitë e majta dhe sindikatat duan ta shfrytëzojnë debatin emocional në prag të votimit që u bë muajin e kaluar kundër “zhvatësve”, për të çuar përpara iniciativën e tyre. Por, sikurse iniciativa 1:12, ashtu edhe ajo për pagën minimale përbëjnë ndërhyrje në lirinë që kanë ndërmarrjet në caktimin e pagave. Për këtë arsye, SAV do të jetë kundër të dyjave.