Ambasada shqiptare reagon për flamurin

Më 2 shtator 2012 gazeta Sonntagsblick, në shtojcën e sportit, në faqen 15, ka botuar një shkrim për futbollin, të cilin e ilustron me një fotografi të flamurit shqiptar me yll përsipër.

Nga burimet e saj Albinfo mëson se Ambasada e Republikës së Shqipërisë në Bernë ka reaguar lidhur me këtë rast me një letër dërguar kryeredaktorit të kësaj gazete.

“Dëshirojmë t’ju rikujtojmë se Flamuri i Republikës së Shqipërisë nuk ka yll. Republika e Shqipërisë është vend i lirë, demokratik, anëtare e NATO-s, që punon për t’u integruar në Bashkimin Europian” thuhet ndër të tjera në letrën e ambasadës shqiptare drejtuar kryeredaktorit të gazetës Sonntagsblick.

“Duke besuar në seriozitetin profesional të gazetës suaj dhe tuajin personalisht, kërkojmë me mirësjellje të bëhet korigjimi, duke ribotuar, krahas korigjimit, edhe fotografinë e flamurit origjinal të Republikës së Shqipërisë” përfundon letra në fjalë.