Vdiq Neil Armstrong, njeriu i parë që eci në Hënë

Ish-astronauti amerikan, Neil Armstrong, njeriu i parë që ka ecur në Hënë në vitin 1969, ka ndërruar jetë në moshën 82-vjeçare, kanë bërë të ditur disa media nga SHBA-ja. Ai kishte pësuar kirurgji të zemrës në fillim të gushtit.

Neil Armstrong ishte ai që shqiptoi fjalët e famshme: “Ky është një hap i vogël për njeriun, por një hap gjigand për njerëzimin”.

Në bordin e anijes Apollo 11 Neil Armstrong dhe Buzz Aldrin, bashkëpunëtori i tij, patën ecur në Hënë, më 20 korrik 1969. Menjëherë pas këtij misioni, ai përfundoi karrierën e tij si një astronaut në vitin 1970 dhe u emërua asistent administrator për aeronautiken në selinë e Agjencisë Amerikane të Hapësirës (NASA).