Agani nuk brengoset për ndryshimet në Qeveri

Ministri kosovar i Shëndetësisë, Ferid Agani nuk është i preokupuar me paralajmërimet për ndryshime në kabinetin qeveritar të Kosovës.

Ai thotë që nuk ka kohë të merret me këtë çështje për shkak të hovit me përgatitjet për fillimin e reformave në sistemin e shëndetësisë dhe për shkak të problemeve të shumta në shëndetësinë kosovare.

Këto komente i ka bërë ministri kosovar i Shëndetësisë gjatë një interviste për albinfo.ch në Cyriht të Zvicrës.

Agani, i cili po qëndron për një vizitë zyrtare në Zvicër, konsideron që Qeveria e Kosovës është stabile.

“Qeveria është stabile, unë e shoh koalicionin qeverisës mjaft stabil në shumë aspekte. Ne jemi duke bërë më të mirën që është e mundur në këtë moment. Jemi mjaft aktivë në shumë fusha dhe jemi duke hapur perspektiva.  Natyrisht, rezultatet nuk shihen brenda një muaji, brenda një viti apo dy  vjetëve. Duhen shumë përgatitje për të pasur rezultatet”.

Ndërsa si kryetar i PD-së, Ferid Agani është i interesuar që institucionet e vendit të jenë sa më unike dhe të fuqishme me një përfaqësim sa më të madh të elektoratit, duke mos e dëmtuar funksionalitetin e tyre.

“Unë mendoj se vendi është para proceseve të rëndësishme dhe mendoj se shkalla sa më e lartë e unitetit ndërmjet faktorit politik do të dëshmojë se proceset janë në të mirë të qytetarëve të vendit dhe çështjeve jetike për shtetin dhe kombin”, ka thënë Agani për albinfo.ch.

Një intervistë më të zgjeruar për vizitën katërditore të ministrit kosovar të Shëndetësisë në Zvicër do ta lexoni nesër në albinfo.ch.