Edita, me “vend pune” në Mauricius

Këngëtarja e shfrytëzon më së miri pozicionin e saj të ri në ishull, për të punuar në muzikë

Ka një kohë që për këngëtaren zvicerane me prejardhje shqiptare, Edita Abdieski nuk dëgjohej shumë.

Në vitin 2010 ajo pati zënë vendin e parë në spektaklin e njohur gjerman të muzikës “X Factor” dhe pas kësaj kishte pasur disa suksese në skenën muzikore gjermane, të cilës i takon prej disa vitesh.

Por, suksesi më i fundit i saj nuk i takon muzikës. Ai ka të bëjë me fillimin e një pune të re dhe atraktive. Pra Edita ka gjetur një “punë ëndrrash”, është bërë bartëse e imazhit të Long beach Hotel në ishullin e njohur për turizëm të kategorisë së lartë, në Mauricius.

“Kur jam në plazh më lindin idetë më të mira”, thotë ajo. Dhe kjo i bie se Edita e shfrytëzon më së miri pozicionin e saj të ri në ishull, për të punuar në muzikë.

Fundja, ajo tash është në vluun e punës për albumin e saj të tretë, i cili duhet të publikohet nga fundi i vitit.