OSBE: Agjencitë shtetërore të Kosovës ta ushtrojnë më fuqishëm pavarësinë e tyre

Agjencitë e pavarura të Kosovës duhet ta ushtrojnë më fuqishëm pavarësinë e tyre, thuhet në raportin e OSBE-së rreth funksionimit të institucioneve të pavarura

Organizata për Siguri dhe Bashkëpunim Evropian (OSBE) me mision në Kosovë, prezantoi të mërkurën në Prishtinë, raportin e vet rreth funksionimit të institucioneve të pavarura dhe marrëdhëniet e tyre me Kuvendin e Kosovës.

Shefi i misionit të OSBE-së, në Kosovë, Werner Almhofer, tha me këtë rast se raporti ka për qëllim t’i adresojë sfidat dhe vështirësitë me të cilat përballen institucionet e pavarura, të cilat janë identifikuar në raport.

Në raport thuhet se në Kosovë ekzistojnë dy lloje të institucioneve të pavarura, ato që mbikëqyrin respektimin nga ana e Qeverisë të standardeve të qeverisjes së mirë, dhe në anën tjetër, agjencitë dhe rregullatorët që kryejnë funksione rregullatore, licencuese dhe kuazi – gjyqësore.

Ndërsa, Avokati i Popullit, Sami Kurteshi, tha se rezultatet kryesore të gjetura në kornizën ligjore, tregojnë se organet e mandatuara për të rregulluar punën e ekzekutivit, duhet të gëzojnë shkallë të lartë të pavarësisë, e në të njëjtën kohë, të mbeten të përgjegjshme para publikut.

Sipas Kurteshit, institucionet e pavarura janë elementi kryesor i demokracisë funksionale në Kosovë “dhe ato duhet që pavarësinë e tyre ta zbatojnë dhe jo ta luajnë rolin e dadove”.

Institucionet e pavarura po ballafaqohen me sfida dhe probleme që më së shumti hasen në marrëdhëniet me qeverinë, legjislativin e gjyqësorin, thuhet në raportin e OSBE-së, rreth funksionimit të këtyre dhe raportet e tyre me Kuvendin e Kosovës.