Fluks mërgimtarësh, radhë të gjata në kufi

Në pikën më të frekuentuar kufitare  ndërmjet Serbisë dhe Maqedonisë në Tabanoc raportohet për radhë të gjata udhëtarësh, kryesisht mërgimtarë nga Maqedonia, që janë shkaktuar nga autoritetet kufitare maqedonase, raporton INA.

Kthimi i mërgimtarëve për pushime në vendlindje, fluksi i turistëve  të huaj që shkojnë për pushime në bregdetin grek dhe turk kanë shkaktuar pritjet e gjata dhe tollovitë e krijuar në këtë pikë kufitare.

Mërgimtarët shqiptarë theksojnë se janë të irituar dhe reagojnë për neglizhenca e autoriteteve kufitare të Maqedonisë, të cilët me ngadalësi vijojnë punën e tyre, duke shkaktuar grumbullimin dhe radhët e gjata të makinave.

Radhët e gjata po shkaktohen edhe nga turqit që udhëtojnë nga vendet evroperëndimore për pushime në vendin e tyre. Turqit shfrytëzojnë Korridorin 10 si destinacion më i afërt në Turqi, përmes territorit grek.

Në pikën kufitare të Maqedonisë janë vënë në dispozicion vetëm tre kolona për të kaluar kufirin, derisa autoritetet serbe kanë dyfishuar ato në gjashtë kolona.

Gjithashtu edhe policët serb fajësojnë autoritetet maqedonase se ato po krijojnë radhët e gjata.

Nga ana tjetër, në njoftimin zyrtar të Auto Moto Lidhjes së Maqedonisë raportohet se nuk ka pritje të gjata në pikat kufitare të Maqedonisë.