Hapësira ajrore e Kosovës nën kontroll të Hungarisë

Mbi 9 mijë e 600 metra, hapësirë e lartë ajrore që i takon Kosovës do të kontrollohet nga viti i ardhshëm nga Hungaria

Kështu ka vendosur NATO-ja duke ia ka besuar Hungarisë kontrollin për trafik civil të hapësirës së lartë ajrore të Kosovës,.

Lajmin e ka bërë të ditur kompania shtetërore për kontrollin e trafikut ajror civil HungaroControl, transmeton ReL.

Ky kontroll do të operohet nga qendra e re e kontrollit të trafikut ajror, që ka kushtuar 45.2 milionë euro, e që do të jetë gati në janar të vitit 2013.  

“Qendra e re do t’i përdorë radarët në Hungari dhe në rajon për ta kryer punën”, tha Kornel Shepesi, nga kompania HungaroControl.

Vendimi i aleancës “është kontribut i përpjekjeve të NATO-s për normalizimin e trafikut ajror në Ballkan dhe stabilizimin e rajonit, në linjë me strategjinë e Hungarisë ndaj rajonit”, tha Zholt Nemeth, sekretar shtetëror në Ministrinë e Jashtme. Më tej ai nënvizoi se “ky nuk është mision politk, por krejtësisht mision teknik”.

Drejtori i Autoritetit të Aviacionit Civil të Kosovës, Dritan Gjonbalaj, tha për Radion Evropa e Lirë se kontrolli i hapësirës së lartë ajrore të Kosovës nga Hungaria do të fillojë bëhet në pranverë të vitit të ardhshëm.Hapësira e lartë ajrore ka qenë e mbyllur për fluturime civile dhe është kontrolluar nga NATO-ja në 13 vitet e fundit, që prej fushatës ajrore të kësaj aleance në vitin 1999.