Nga Gjermania te FC Prishtina

23-vjeçari, që luan me dy këmbët, më parë ka luajtur edhe për Karlsruhen, Freiburgun dhe më pas te Aalen, Nurnberg II e së fundmi në Rumani te Botosani

Klubi i futbollit Prishtina ka njoftuar se ka arritur marrëveshje me sulmuesin shqiptar të lindur në Gjermani, Mërgim Neziri, shkruan albinfo.ch.

23-vjeçari, që luan me dy këmbët, më parë ka luajtur edhe për Karlsruhen, Freiburgun dhe më pas te Aalen, Nurnberg II e së fundmi në Rumani te Botosani.

“Kam lindur në Gjermani edhe pse jam me prejardhje nga Gjilani dhe në Kosovë kam familje të ngushtë dhe kuptohet se këtu ndjehem si në shtëpinë time. Prishtina më ka ofruar të gjitha kushtet dhe jam jashtëzakonisht i kënaqur. Prishtina është klub i madh dhe me traditë dhe kam shumë besim se do të realizoj ëndrrën evropiane me klubin më të madh në vend”, ka thënë sulmuesi i ri i skuadrës, Neziri, thuhet në njoftimin e klubit kryeqytetas.

Prishtina po ashtu ka njoftuar se nga Shkolla e futbollit Prishtina është promovuar Donat Hasanaj që ka nënshkruar kontratë profesionale me klubin.

Ditë më parë Prishtina emëroi trajner Kushtrim Munishin, derisa duhet theksuar se i janë bashkuar edhe tre ish-futbollistë të Kombëtares shqiptare, Debatik Curri, Ahmed Januzaj dhe Armend Dallku.