Xhaka, ky lider i heshtur

Granit Xhaka i cili ndihmoi Zvicrën që për herë të parë të kalojë grupet, do të ndeshet me Poloninë, është i jashtëzakonshëm me top dhe pasime, edhe kur është nën presion

Është folur shumë për Granit Xhakën në ndeshjen me Francën. Më shumë për fanellën e tij që është shqyer dy herë sesa paraqitjen e tij, që nuk bie shumë në sy, shkruan albinfo.ch.

Kontributi i tij ndoshta nuk vërehet shumë, por ai ishte futbollisti kryesor i Zvicrës, që e dominuan Francën me 59 % të posedimit të topit. Ai ka një elegancë të madhe, derisa në dy takimet e para ishte zgjedhur lojtari i ndeshjes.

Xhaka i cili ndihmoi Zvicrën që për herë të parë  të kalojë grupet, do të ndeshet me Poloninë, është i jashtëzakonshëm me top dhe pasime, edhe kur është nën presion.

Ai ka bërë 292 pasime të sakta, ku më i mirë ishte vetëm Toni Kroos, derisa ishte më i mirë se Andres Iniesta. Gjithashtu përqindja prej 92 e bën atë lojtarin me përqindjen më të mirë të pasimeve të sakta deri më tani në këtë Evropian.

Xhaka, i cili iu bashkua Arsenalit nga Borussia Moenchengladbach, punën më të madhe e bën në zonën e Zvicrës, duke i ndihmuar ekipit të tij në mbrojtje. Ai është i mirë në mbrojtje dhe në sulm. Gjashtë gola ka në 46 ndeshje me Zvicrën dhe nënta gola në Bundesligë për katër vjet me Borussian. Trajneri i Zvicrës, Vladimir Petkoviq ka thënë para Evropianit se Xhaka do të jetë kapiten i ardhshëm i Zvicrës. “Ai mund të marrë përgjegjësinë. Ai ka karakter për këtë. Ai është i gatshëm të jetë lider i ekipit. Xhaka mund të jetë arma e duhur për trajnerin. Ai gjithashtu është shumë i kujdesshëm”, kishte thënë Petkoviq.