Formacioni i refugjatëve me pesë shqiptarë

Dy vëllezërit Xhaka (Taulanti dhe Graniti), Lorik Cana, Valon Behrami dhe Xherdan Shaqiri e përbëjnë formacionin më të mirë të refugjatëve në “Euro 2016”

Shoqata Futbolli Kundër Racizmit në Evropë, FARE, ka përpiluar një listë prej 11 futbollistëve më të mirë refugjatë të evropianit. Formacioni përbëhet nga pesë futbollistë shqiptarë, shkruan albinfo.ch.

Dy vëllezërit Xhaka (Taulanti dhe Graniti), Lorik Cana, Valon Behrami dhe Xherdan Shaqiri e përbëjnë formacionin më të mirë të refugjatëve në “Euro 2016”. Taulant Xhaka dhe Lorik Cana luajnë për Kombëtaren shqiptare, derisa Granit Xhaka, Valon Behrami dhe Xherdan Shaqiri për Zvicrën.

Në këtë 11-she më të mirë është edhe futbollisti më i mirë kroat Luka Modriq, i cili gjatë luftës për pavarësi në Kroaci, ka migruar me familje drejt Austrisë.

Në portë është Steve Mandanda i Francës, i cili është i lindur në Republikën Demokratike të Kongos dhe ka migruar në Francë. Corluka, Jonuzoviq, Benteke dhe Kujoviq janë lojtarët tjerë në këtë formacion.