Kuvendi miratoi rezolutën për bisedime me Serbinë

Kuvendi i Kosovës e ka miratuar sot një rezolutë lidhur me për bisedimet me Serbinë. Me 63 vota për, 48 kundër dhe një abstenim, rezoluta e paraqitur nga partitë në pushtet, mori shumicën e votave të deputetëve.

Në emër të PDK-së në pushtet, si propozuese e rezolutës, deputeti Adem Grabovci tha se dy takime me opozitën kanë dështuar që të rezultojnë me harmonizimin e tekstit të saj, andaj u kërkua nga Kuvendi që të votohet versioni i propozuar nga PDK-ja.

Deputeti i AAK-së opozitare, Daut Haradinaj e cilësoi këtë dialog të dëmshëm për Kosovën. Po ashtu, edhe Visar Ymeri i Vetëvendosjes u pozicionua kundër bisedimeve.

Grupi më i madh opozitar – LDK-ja nuk e ka mbështetur rezolutën, pasi që në tekstin e saj nuk janë përfshi propozimet e kësaj partie politike.

Rezoluta u tha se do t’i japë një rol shtesë Kuvendit në mbikëqyrjen e procesit të filluar të bisedimeve ndërmjet Qeverisë së Kosovës dhe asaj të Serbisë.

Kuvendi i Kosovës kishte zhvendosur fillimisht votimin e rezolutës për bisedimet me Serbinë si pikën e fundit të rendit të ditës, shtyrje kjo që u nënkuptua në Kuvend si mundësi që bisedimet pozitë-opozitë rreth tekstit të kësaj rezolute të vazhdojnë.

Rezoluta për bisedimet me Serbinë është paraqitur të hënën si një përkufizim i vijave të kuqe për qeverinë e Kosovës, për temat të cilat nuk mund t’i bisedojë fare me Serbinë.