Boksierët shqiptarë kujtojnë Muhamed Alinë

Ai është konsideruar si sportisti më i madh në botë dhe bota e sportit humbi shumë me vdekjen e tij

Muhamed Ali është cilësuar si sportisti më i madh i të gjitha kohërave nga shumë mediume. Vdekja e tij ka zgjuar reagime në mbarë botën, e sigurisht edhe nga boksierët kosovarë, shkruan albinfo.ch.

Njëri ndër të parët që reagoi ishte Luan Krasniqi. “Sot jam i pikëlluar, tejet i pikëlluar. Vdiq Muhamed Ali! Legjenda e legjendave të boksit. Emër që e lartësoi këtë sport dhe neve, pasardhësve të tij. Emër që mbetet i përjetshëm në histori. Unë njëkohësisht jam krenar që marshova në ringje në epokën e Muhamed Ali. Jam i lumtur që pata takime të ngrohta me legjendën, që i kujtoj me kënaqësi sot e përherë. Dhe, si mund të mos mbahet në zemër ky takim madhështor, kjo atmosferë ngazllyese?!!! Lavdi Legjendë!”, shkroi Krasniqi në “Facebook”.

Boksieri shqiptar Nuri Seferi, i ka dhënë lamtumirën legjendës së boksit Muhamed Ali, duke shkruar. “Legjendë që do të kujtohet gjithmonë. Historia”, shkroi Seferi.

Atë e kujtoi edhe Arnold Gjergjaj, i cili jeton dhe vepron në Zvicër. “Ne e kemi humbur më të madhin e të gjitha kohërave dhe legjendën brenda dhe jashtë ringut. Kujtimet për të do të jetojnë gjithmonë”, ka shkruar Gjergjaj në “Facebook”.

Por, legjendën botërore e ka kujtuar edhe legjenda kosovare e boksit, Aziz Salihu. “Ndërron jetë sportisti më i madh dhe më i dashur i të gjithë kohërave në botë. U preftë në paqe”, shkroi Salihu.