Kosova Petrol merr shpërblim në Zvicër

Ndërmarrja Kosova Petrol, ditë më parë është shpërblye nga “Otherways Managment & Consulting Asociation”, në Zvicër për ofrimin e cilësisë së lartë të prodhimeve dhe sjellje korrekte ndaj konsumatorëve.

Kryetari i Odë Ekonomike të Kosovës (OEK), Safet Gërxhaliu ka organizuar të enjten takimin tradicional “Klubi i Biznesit”, ku paraqiti shpërblimin e marrë të Kosova Petrolit. Sipas tij, ky shpërblim paraqet një sukses për këtë kompani dhe gjithë ndërmarrjet vendore, të cilat ballafaqohen me vështirësi të shumta në fushën e biznesit.

“Kjo dëshmon se ndërmarrjet e Kosovës përkundër vështirësive të shumta me të cilat ballafaqohet shpirti ndërmarrës e ka forcën e vet dhe sukseset nuk do të mungojnë as në të ardhmen”, ka thënë Gerxhaliu.

Ndërsa, ministri në largim i Integrimeve Evropiane, Besim Beqaj, ka thënë se rruga e Kosovës drejt integrimit evropian bëhet me ndërmarrësi dhe ekonomi të zhvilluar.

Ambasadori i Zvicrës në Kosovë, Lukas Beglinger, theksoi se sektori privat është në rrugë të mirë dhe se për sukses të mëtutjeshëm kërkohet vendosmëri.

“Klubi i Biznesit” është formë e aktiviteteve të suksesshme të OEK-ut, që ka për qëllim prezantimin e ndërmarrjeve të suksesshme, të cilat me veprimtarinë e tyre janë shembull për afarizëm të suksesshëm.