Hashim Thaçi zgjidhet president i Kosovës

Në raundin e tretë, Hashim Thaçi zgjidhet president i Republikës së Kosovës për mandatin 5 vjeçar. Pro Thaçit votuan 71 deputetë, kurse 10 abstenuan

Pas tri raundesh, Kuvendi i Kosovës me shumicën e thjeshtë të votave, ka zgjedhur Hashim Thaçin president të ri të Republikës së Kosovës. Për Thaçin votuan 71 deputetë ndërsa 10 deputetë abstenuan. Në raundin e fundit, kandidati tjetër, Rafet Rama nuk e mori asnjë votë.

Pas shpalljes president, Thaçi falënderoi deputetët për besimin që ia kanë dhënë. “Ky besim është një përgjegjësi më tepër për ti shërbyer vendit. Ju falënderoj shumë i nderuar ambasador për qëndrimin tuaj me ne gjatë tërë ditës. Dëshiroj që të falënderoj të gjithë deputetët e të gjitha partive politike që ishin prezentë sot në votim”, tha ai.

18:56: Thaçi dështon edhe raundin e dytë

Nga 81 deputetë sa ishin në seancë, për Hashim Thaçi në raundin e dytë votuan 64 deputetë, Rafet Rama mori 2, ndërsa 15 deputetë abstenuan.

Partnerët e koalicionit, PDK-LDK, kanë dështuar edhe në raundin e dytë që ta votojnë të nominuarin e tyre, Hashim Thaçin për president të shtetit. Në këtë raund, zëvendëskryeministri Thaçi mori më shumë vota se herën e parë, por jo mjaftueshëm që të zgjidhet presidenti i pestë i Kosovës së pasluftës.

Nga 81 deputetë sa ishin në seancë, për Hashim Thaçi votuan 64 deputetë, Rafet Rama mori 2, ndërsa 15 deputetë abstenuan.

18.14: Thaçi dështon në raundin e parë, shkohet në rivotim

Kuvendi i Kosovës tashmë ka filluar raundin e dytë të votimit të fshehtë për president ndërmjet dy kandidatëve, Hashim Thaçit  dhe Rafet Ramës, pasi që në raundin parë dështuan t’i marrin dy të tretat e votave, që i bije 80 nga 120 sa i ka Kuvendi kosovar. Madje në raundin e parë, asnjëri nga kandidatët nuk fitoi as shumicën e thjeshti, 61 vota.

Pas përjashtimit të opozitës, në seancën e veçantë kanë qenë të pranishëm 82 deputetë. Për Thaçin votuan 50 deputetë, Rafet Rama mori 4 vota ndërsa të pavlefshme u shpallën 27 vota, kurse një deputet nuk mori pjesë në votim. Ky votim ngjalli reagime të partnerët e koalicionit, madje vetë kryeministri Isa Mustafa bisedoi kokë me kokë, me deputetët e tij.

Në raundin e dytë, të pranishëm në sallë janë 81 deputetë, që plotëson kuorumin për procedim të mëtejmë të zgjedhjes së presidentit. Nëse edhe në këtë raund asnjëri nga kandidatët nuk i siguron 80 vota, shkohet në raundin e tretë, ku presidenti zgjidhet me shumicën e thjeshtë, 61 votë.

Nëse nuk sigurohen votat e mjaftueshme, mund të shkohet në zgjedhje të jashtëzakonshme që është edhe kërkese e opozitës.

Në anën tjetër, protesta e opozitës ka kaluar në dhunë, ku ka më shumë se 2 orë që po përleshen protestuesit dhe policia. Protestuesit e opozitës po e kundërshtojnë zgjedhjen e Thaçit president. Ndërkaq para selisë së PDK-së në sheshin “Nënë Tereza” janë disa simpatizant të PDK-së që po presin të festojnë nëse Thaçi zgjidhet president i vendit.