Xhaka i lënduar, 4-6 javë jashtë fushës!

Ai pritet të jetë i gatshëm në ndeshjen për kualifikim në Kampionatin Evropian kundër Bullgarisë, më 6 shtator

Granit Xhaka mund të mbetet jashtë fushës së gjelbër për katër deri 6 javët e ardhshme. Ai ka lënduar ligamentet e brendshme të gjurit të mërkurën, gjatë ndeshjes kundër West HamUnited-it në turnirin “Kupa e Orëve” të mbajtur në Grenchen.

Megjithatë, lëndimi i tij do të kurohet me metoda konservative që do të thotë se nuk do të operohet, transmetojnë mediet zvicerane përgjegjësit nga Fc Basel.

Në gjendjen që është tash, Xhaka do të mbetet jashtë ndeshjeve të javëve të para në superligën zvicerane por edhe jashtë asaj të përfaqësueses së Zvicrës me Lichtenshtajnin, e cila do të luhet më 10 gusht në Vaduz.

Megjithatë, Xhaka pritet që të jetë i gatshëm për t`u angazhuar në ndeshjen për kualifikim në Kampionatin Evropian që Zvicra do ta luajë kundër Bullgarisë, më 6 shtator si dhe në ndeshjen FC Baselit në kuadër të Ligës së kampionëve më 13/14 shtator.