Vritet në Suedi burri që e kishte djegur Kuranin

Një refugjat irakian dhe aktivist kundër Islamit u qëllua për vdekje në Suedi të mërkurën vonë, vetëm disa orë para se t’i shqiptohej një vendim nga gjykata pas gjykimit për djegien e Kuranit, sipas dokumenteve të gjykatës të enjten, përcjell albinfo.ch.

Salwan Momika, 38 vjeç, u qëllua për vdekje në një shtëpi në qytezën Sodertalje afër Stokholmit, raportoi transmetuesi publik, SVT.

Momika kishte djegur kopje të Kuranit në protesta publike më 2023 kundër Islamit, raporton agjencia e lajmeve “Reuters”.

Një gjykatë në Stokholm pritej t’i dënonte Momika-n dhe një burrë tjetër të enjten në një gjykim rreth “shkeljeve të agjitacionit kundër një grupi etnik ose kombëtar”, por tha se njoftimi i vendimit është shtyrë.

I pandehuri tjetër në rastin e njëjtë gjyqësor shkroi një porosi në rrjetin X të enjten: “Unë jam në radhë.”

Policia suedeze konfirmoi se një burrë u qëllua për vdekje në Sodertalje rreth orës 22:00 të mërkurën, por nuk komentoi më tej.

Mediat suedeze raportuan se Momika ishte në transmetim të drejtpërdrejtë në rrjetin “TikTok” në momentin e vrasjes.

Në një video që e ka parë agjencia “Reuters” shihet policia duke marrë një telefon dhe duke ndërprerë një transmetim të drejtpërdrejtë që dukej se ishte nga llogaria e Momika-s në “TikTok”.