Vetëvendosje merr pjesë në mbledhjen konstitutive të Kuvendit

Vetëvendosje ka bërë të ditur se për ndryshimin e datës së konstituimit të Kuvendit të ri ka mësuar nga mediat

Lëvizja Vetëvendosje ka reaguar ndaj vendimit të Kryesisë së Kuvendit të kaluar që mbledhja konstitutive e Kuvendit të Kosovës të mbahet më 21 shkurt, e jo më 24 shkurt.

Vetëvendosje ka bërë të ditur se për ndryshimin e datës së konstituimit të Kuvendit të ri ka mësuar nga mediat, duke e cilësuar këtë si vendim jodemokratik.

“Lëvizja Vetëvendosje i kundërshton praktikat e tilla jodemokratike të vendimmarrjes institucionale, të cilat subjektet politike i trajtojnë si dekor apo objekte që duhet t’i përshtaten vendimeve arbitrare. Ne jemi për institucione politike të cilat funksionojnë në mënyrë demokratike – ku ka llogaridhënie dhe transparence”, thuhet në një reagim të Vetëvendosjes.

Po ashtu Vetëvendosje ka njoftuar se do të marrë pjesë në mbledhjen konstitutive. “Duam të theksojmë se krijimi i shembujve të tillë të sjelljes dhe krijimi i njëmendësie të tillë jodemokratike janë shenja të një pushteti që në mënyra të tilla arbitrare merr edhe vendime tjera më të mëdha, duke filluar prej ngritjes së pagave pa mbulesë financiare për qëllime elektorale, e deri te privatizimi i PTK-së për hesape partiake”, thuhet në reagimin e Vetëvendosjes.