Vendet e BE-së mund t’i mbyllin kufijtë

Parlamenti i BE-së vendosi që në rast nevoje, 26 vendet e BE-së që përbëjnë zonën e Shengenit do të lejohen t'i mbyllin kufijtë e tyre deri në dy vjet.

Kufijtë e hapur dhe liria për të udhëtuar lirshëm janë tiparet e BE-së. Përmes Passarelle des deux Rives, Urës së dy Brigjeve, mund të shkosh në vetëm pak minuta nga Strasburgu në Francë, në Gjermaninë fqinjë, në Kehl.

Por shumica në Parlamentin Evropian mendon se është e nevojshme një reformë e marrëveshjes Shengen. Në raste nevoje, vendet e BE-së do të lejohen në të ardhmen t’i mbyllin kufijtë e tyre deri në dy vjet.

Kjo do të monitorohet nga Komisioni i BE-së.

Sidomos Gjermania luftoi për rregulla të reja për lirinë e udhëtimit, sepse sipas fjalëve të eurodeputetit Manfred Weber: „Askush nuk e kishte menduar që ka shtete që nuk arrijnë t’i sigurojnë kufijtë e tyre, si p.sh. Greqia, dhe për shkak të përvojave të tilla kjo gjë duhet rregulluar rishtazi.”

Të Gjelbërit në Parlamentin e Evropës mendojnë se nuk ka arsye për të ndryshuar një nga arritjet më të rëndësishme të Evropës.

“Ne të Gjelbrit mendojmë se marrëveshja e Shengenit është një gur themeli i BE-së, se është diçka prej së cilës qytetarët e BE vërtetë që pëfitojnë dhe që e perceptojnë në jetën e përditshme dhe ne na duket e pabesueshme që tani po i vihet sëpata Shengenit.”, thotë eurodeputetja Ska Keller, e grupit të partive ekologjike.

Evropianët e rinj, si nxënësit shkollave, që e njohin Evropën deri tani vetëm pa trarët e pikave kufitare , ndoshta duhet të mësohen me një realitet tjetër.