Topi: Shqiptarët e Luginës së Preshevës, të ruajnë unitetin

Presidenti i Shqipërisë, Bamir Topi ka thënë se po ndjek me vëmendje të veçantë zhvillimet në Luginën e Preshevës

Kreu i shtetit, ka vënë në dukje rëndësinë e trajtimit të shqiptarëve sipas standardeve demokratike ndërkombëtare, si dhe ka shprehur mbështetjen e palëkundur për të drejtat themelore të shqiptarëve në atë rajon dhe përfshirjen e tyre si qytetarë të barabartë në jetën politike, shoqërore dhe institucionale të shtetit të Serbisë.

Gjatë një takimi me kryetarin e Bujanovcit, Jonuz Musliu dhe kryetarin e Preshevës, Ragmi Mustafa, presidenti i Shqipërisë ka theksuar se është në interesin e të gjithë qytetarëve të Preshevës, Bujanovcit dhe Medvegjës që të mundësohet një ambient i shëndoshë sigurie, duke i bërë thirrje, me këtë rast, të gjithë faktorit politik shqiptar atje, që të ruajë qetësinë dhe unitetin, duke shmangur acarimet dhe përplasjet politike.

“Është shumë e rëndësishme, që për përmbushjen e kërkesave tuaja të drejta dhe legjitime ndaj shtetit serb, shqiptarët shprehen më një zë dhe të mbajnë një qëndrim”, ka thënë Topi.

Kryetari i Bujanovcit, Jonuz Musliu dhe kryetari I Preshevës, Ragmi Mustafa e kanë vlerësuar rolin e presidentit Topi dhe përpjekjet e vazhdueshme për rritjen e njohjeve ndërkombëtare të pavarësisë së Kosovës, shprehën mirënjohjen e thellë për këtë takim të rëndësishëm, si dhe për kontributin e tij personal e institucional në të gjithë këtë proces.