Thaçi, kritikon ICO-n dhe EULEX-in

Kryeministri Hashim Thaçi e ka vlerësuar të panevojshme ndërhyrjen që mbikëqyrësi i pavarësisë, Pieter Feith, e ka bërë në rastin e përzgjedhjes së guvernatorit të venditThaçi e ka ftuar Feithin që përgjigjen e pyetjes pse Prokuroria Speciale e Kosovës deshi ta hetonte, ta gjejë në “shtëpinë ku punon” e jo gjetiu, raporton Koha Ditore. 

Kryeministri e ka pranuar se në raste të caktuara nuk është pajtuar me qasjet e Feithit, ashtu sikurse Feith nuk është pajtuar me qasjet e tij.

Ai ka thënë se tekefundit nuk është i thirrur për ta dëgjuar diplomatin holandez, por për ta qeverisur vendin. ICO-ja, sipas tij ka bërë gabime edhe sa u përket mosveprimeve në veri të vendit, ashtu sikur që ka mund të ketë bërë gabime edhe vetë Qeveria.

Shefi i qeverisë, nuk është rezervuar nga kritikat as për EULEX-n. Ai ende vazhdon të besojë se ndërhyrja e EULEX-it në Ministrinë e Transportit dhe Telekomunikacionit, kur ajo është drejtuar nga ish-ministri, Fatmir Limaj, ka qenë e motivuar politikisht nga ndërkombëtarë me influencë në Kosovë.