S’ka gjatë verës pasaporta biometrike

Gjatë kësaj vere nuk do të jepen pasaporta biometrike për qytetarët e Kosovës.

Edhe pse pati paralajmërime se një gjë e tillë do të ndodhë në fillim të korrikut, megjithatë, sipas drejtuesve të Ministrsë së Punëve të Brendshme (MPB), Ministri Bajram Rexhepi ka thënë se deri në tetor të këtij viti do të prodhohen pasaportat biometrike, si një nga parakushtet për liberalizim të vizave. “Nëse gjithçka shkon sipas dinamikës së paraparë, në tetor do të nxirren pasaportat biometrike”, tha ministri Rexhepi. 

Por, askush nga subjektet politike të taborit opozitar nuk beson se ministri i Punëve të Brendshme do të mund të arrijë që deri në tetor të këtij viti t’i lëshojë pasaportat e para biometrike.

Ismet Beqiri, shef i Grupit Parlamentar LDK-së, është shprehur skeptik nëse deklaratat e ministrit Rexhepi do të jetësohen në vjeshtën e këtij viti. “Jam skeptik se kjo qeveri do të arrijë t’i lëshojë pasaportat, duke marrë parasysh premtimet e deritashme, të cilat nuk i ka realizuar. Kjo qeveri është një qeveri e lodhur në këtë drejtim dhe do të ketë ngecje”, ka thënë Beqiri.

Ngjashëm është shprehur edhe nënkryetari i AAK-së, Ahmet Isufi, i cili ka theksuar se do të ishte më mirë që ministrat e kabinetit qeveritar të punojnë në drejtim të lëshimit të pasaportave biometrike, sepse premtimi i datave shpesh po i sjell qeveritarët të jenë në kundërshtim me vetveten. “Më mirë do të ishte të punonin dhe mos të merren me parashikime. Është mirë që ministrat të jenë të kujdesshëm në deklarimet e tyre, sepse po e dëmtojnë vetveten më pastaj”, ka thënë Isufi.