Sigurohen mbi 85 mijë vaksina kundër gripit sezonal

Ministria e Shëndetësisë e Kosovës ka njoftuar se bazuar në Planin e vaksinimit të Institutit Kombëtar të Shëndetësisë Publike janë siguruar 85.500 vaksina kundër gripit sezonal.

Shpërndarja e këtyre vaksinave ka filluar përmes Institutit Kombëtar të Shëndetësisë Publike, i cili i shpërndan ato në Qendrat Kryesore të Mjekësisë Familjare, ku qytetarët mund të vaksinohen.

“Prej vaksinave të siguruara, të cilat jepen falas për qytetarët, 85 000 janë vaksina për të rritur, ndërsa 500 të tjera janë vaksina për fëmijë (pediatrike) kundër gripit. Vlera financiare e këtyre vaksinave të siguruara është 478. 670.00 €”, thuhet në njoftim, përcjell albinfo.ch.

Kjo ministri u bën thirrje grupeve më të rrezikuara, siç janë të sëmurët kronikë dhe të moshuarit që t’i shfrytëzojnë vaksinat për mbrojtje kundër gripit sezonal.