Shumë aktivitete për diasporën edhe në Ferizaj

Komuna e Ferizajt edhe sivjet ka përgatitur një agjendë të ngjeshur kulturore për nder të mërgimtarëve të cilët po i kalojnë pushimet në vendlindje

Edhe në Komunën e Ferizajt do të zhvillohen shumë aktivitete në kuadër të “Ditët e Diasporës”, njofton albinfo.ch.

17 aktivitete kulturore do të shoqërojnë mërgimtarët në mjedise të ndryshme.

Komuna e Ferizajt edhe sivjet ka përgatitur një agjendë të ngjeshur kulturore për nder të mërgimtarëve të cilët po i kalojnë pushimet në vendlindje, ka njoftuar drejtori për Kulturë, Rini dhe Sport, Naim Ferati në një konferencë për media.

Ai pohoi se temat që do të trajtohen nga data 27 korrik e deri më 6 gusht në takimet e shumta do të jenë të larmishme dhe do ta ofrojnë atdheun në mënyrën më të bukur posaçërisht para fëmijëve të mërgimtarëve.

Në kuadër të aktiviteteve kulturore “Ditët e Diasporës” sivjet është planifikuar edhe një risi mjaft interesante ku do të anketohen mërgimtarët për përshtypjet, kërkesat apo dëshirat e tyre për sa kohë që do të qëndrojnë në Ferizaj.

Pjesë e aktiviteteve sivjet për herë të parë është edhe një aktivitet i lirë noti si dhe ngjitje të organizuara nëpër vendet apo majat me të larta të maleve për të promovuar kështu sa më shumë bukuritë natyrore që ka Kosova.