Shtërpca përgatit ofertën turistike

Hapjen e kësaj zyre e ka përkrahur edhe Kuvendi i Shtërpcës, i cili më shumicë votash e ka marrë vendimin për hapjen e saj

Shtërpca shumë shpejt do të hapë një zyrë për turistët që vizitojnë këtë komunë, e cila do të ketë për qëllim ofrimin e informacioneve për resurset natyrore e turistike.

Zyrtarët komunalë, kanë thënë se dobia e saj është shumë e madhe, duke pasur parasysh se do të bashkohet e tërë oferta turistike në një vend, që përfshin informata mbi strehimin e turistëve, hartat malore, por edhe promovimin e produkteve të blegtorisë.　

Radolub Mlladenoviq, drejtor i Zhvillimit Ekonomik, i Turizmit, i Bujqësisë dhe i Pylltarisë në Shtërpcë, ka thënë se Komuna ka kapacitete të mëdha turistike, por për këto është punuar shumë pak deri më tash. Ai ka theksuar se së pari Komuna e ka bërë përgatitjen e planit, ka marrë vendimin e Kuvendit dhe është duke shqyrtuar kornizën ligjore brenda së cilës do të funksionojë kjo zyrë, raporton Koha Ditore.　

“Deri më tash s’kemi pasur asnjë panoramë mbi bukuritë natyrore dhe ofertën turistike të Shtërpcës dhe thënë thjesht, turistët kanë qenë të painformuar. Ne pretendojmë të bashkojmë një ofertë turistike me të gjitha të dhënat për turizmin në Komunë, e cila pak a shumë do t’u ngjajë ofertave rajonale dhe atyre amerikane”, ka thënë drejtori Mlladenoviq.

Sipas tij, dobia e kësaj zyre do të jetë shumë e madhe edhe për sektorin privat, pasi që do të mund t’i promovojë produktet e veta.　

Hapjen e kësaj zyre e ka përkrahur edhe Kuvendi i Shtërpcës, i cili më shumicë votash e ka marrë vendimin për hapjen e saj. Ali Halimi, këshilltar opozitar nga PSK-ja në Shtërpcë, ka thënë se iniciativa e Drejtorisë së Zhvillimit Ekonomik është përkrahur edhe nga ky subjekt politik, duke pasur parasysh se është në të mirë të qytetarëve dhe të prodhuesve lokalë.