Shqiptarja nga Kosova, në mesin e viktimave të talibanëve

Televizioni Klan Kosova njofton se identiteti i viktimës kosovare në Afganistan është Zylfie Bytyçi nga Ferizaj

Sipas njoftimeve që fillimisht i ka dhënë CNN dhe të cilave u janë referuar edhe medie shqiptare, në mesin e viktimave si pasojë e një sulmi vetëvrasës të talebanëve në Afganistan, është edhe një shqiptare nga Ferizaj.

Një autobus i blinduar ushtarak i NATO-s është sulmuar të shtunën në Kabul nga një sulmues vetëvrasës me makinë bombë, ka njoftuar CNN.

Ndërkohë, televizioni Klan Kosova, njofton se identiteti i viktimës kosovare në Afganistan është Zylfie Bytyçi nga Ferizaj, e cila deri në vitin e kaluar ka punuar në kampin Bondstill, kurse pastaj ka shkuar për të punuar në Afganistan nëpërmjet një firme amerikane.

Sulmi ka shkaktuar vdekjen e më së paku 13 njerëzve, ndërsa në autobus mund të ketë pasur edhe kosovarë të tjerë, të cilët mësohet se kanë shpëtuar e mund të ndodhë që edhe janë lënduar.

Ferizajasja e re punonte për një kompani private të kontraktuar nga ushtria amerikane, përfaqësues të së cilës kanë njoftuar familjen e saj për ngjarjen e rëndë.

Sulmin e kanë marrë përsipër talibanët.