Shqipëria në rrjetin e gazit Trans-Adriatik

Realizimi i gazsjellësit Trans-Adriatik do të jetë një hap i madh përpara në hapjen e korridorit jugor të gazit

Konsorciumi për menaxhimin e gazsjellësit “Trans-Adriatik” ka bërë të ditur se i ka dërguar Shqipërisë aplikacionin përkatës në mënyrë që ajo të bëhet pjesë e këtij projekti të rëndësishëm për transportimin e gazit nga Lindja drejt Perëndimit.

Drejtori menaxhues i TAP-it, Kjetil Tungland, ka deklaruar se projekti në fjalë, me një hap të tillë, tashmë është zhvendosur një hap më afër realizimit të tij konkret, duke u bërë kështu një ëndërr e prekshme edhe për Shqipërinë, shkruajnë mediat shqiptare.

Sipas tij kërkesa për aplikim që i është dërguar Shqipërisë, i është paraqitur edhe Greqisë e Italisë, në mënyrë që edhe ato të mund të marrin gaz natyror përmes territorit të tyre, të përcjellë nga vendet e Lindjes.

TAP u dërgon në këtë mënyrë palëve të treta aplikimet në mënyrë që konsorciumi të hyjë në një marrëveshje me transportuesit e parë të gazit, të cilët punojnë në fushën Deniz Shah II në Azerbajxhan.

TAP, në një deklaratë të fundit, citon se realizimi i gazsjellësit Trans-Adriatik do të jetë një hap i madh përpara në hapjen e korridorit jugor të gazit, duke diversifikuar furnizimin dhe rritjen e sigurisë energjetike për Evropën”.

Bashkimi Evropian është duke kërkuar një rrjet tubacionesh në Korridorin jugor që mbështetet në gazin natyror të vënë në dispozicion nga Azerbajxhani.