Shfaqet filmi dokumentar “Pizza Bethlehem”

Në filmin dokumentar “Pizza Bethlehem” të regjisorit zviceran Bruno Moll, në mesin e yjeve janë edhe shqiptaret Elmaze Sinani nga Maqedonia dhe Agime Murina nga Kosova. Në këtë film, regjisori rrëfen për një integrim të dashur në mes të të huajve që jetojnë në Zvicër.

Shembull i mirë për këtë janë edhe shqiptaret Elmazja dhe Agimja, të cilat jetojnë në një lagje të qytetit të Bernës, nga e cila nga 13.000 banorët e saj, 36 për qind janë të huaj. Protagonistet Elmazja dhe Agimja me shoqet e veta, janë futbolliste të zellshme të ekipit junior të FC Bethlehem. Në film pasqyrohet rrjeti social i të rejave të cilat integrohen në ekipin futbollistik, të udhëhequra nga Gianluca De Febis, i cili gjithashtu është me prejardhje migranti.

Përndryshe, regjisori Moll i kishte shoqëruar futbollistet që nga muaji mars e deri në qershor të vitit të 2009. Por jo vetëm në fushën e gjelbër, ai kishte qenë me to edhe nëpër shtëpitë e tyre, gjatë blerjes nëpër shtëpi mallrash, nëpër shkolla apo në kërkim të ndonjë vendi për praktikante etj. Ato nuk përtojnë të flasin për familjet e veta, religjionin, identitetin dhe vendlindjen, mbi dashurinë, miqësinë dhe gjithçka tjetër që femrat i preokupon në këtë moshë.

Por, Agimja, Alessandra, Daria, Elmazja, Marie, Natasa, Rosa, Tiziana dhe Yolanda mdonjëherë hanë edhe me oreks ndonjë picë. Filmi ishte realizuar me një buxhet prej 240.000 frangash zvicerane.

Përndryshe, filmi ka pasur jehonë të madhe në Zvicër dhe është shfaqur në disa kinema, ndërsa gjatë vitit të kaluar fitoi “Çmimin e filmit në Bernë”.