Sa mund të jetojnë njerëzit?

Njerëzit mund të jetojnë jo më shumë se 120 deri në 150 vjet, sipas një studimi, që shqyrtoi marrëdhënien mes plakjes dhe përballimit të stresit, i publikuar në revistën “Nature Communications”.

Në kuadër të hulumtimit, pjesëmarrësve iu bënë matje të rezistencës kundër stresit duke u bazuar në të dhënat e mbledhura nga aplikacionet e smartphone-ve dhe të dhënat mjekësore të vullnetarëve nga BM dhe SHBA.

Shkencëtarët nënvizuan se tek ata që iu nënshtruan studimit “u vu re një rënie në aftësinë e përmirësimit teksa mosha përparon”.

“Sa më shumë përparon plakja, aq më shumë zgjatet koha që nevojitet për shërimin e sëmundjeve”, tha drejtuesi i studimit, Timothy V. Pyrkov, transmeton ATSH, përcjell albinfo.ch.

Në studim u theksua se edhe pjesëmarrësit më të shëndetshëm “kanë të njëjtat kritere themelore të plakjes”.

Si rrjedhojë, studimi përfundon se, nëse nuk zhvillohen trajtime të drejta për të vonuar plakjen, parandalimi dhe trajtimi i sëmundjeve të lidhura me moshën nuk mund të ndryshojë jetëgjatësinë maksimale, 120 deri 150 vjeç.