Rritet numri i pacientëve të aksidentuar në trafik

Sipas një raporti të Klinikës Emergjente gjatë gjashtë muajve të kaluar, 763 pacientë kanë kërkuar ndihmën emergjente mjekësore

Në Qendrën Klinike Universitare të Kosovës (QKUK) në Prishtinë raportohet për rritje të dukshme të numrit të pacientëve nga aksidentet më trafik. Sipas një raporti lëshuar të mërkurën, gjatë gjashtë muajve të kaluar në Qendrën emergjente kanë kërkuar ndihmë mbi 760 qytetarë, ndërsa disa prej tyre kanë mbetur invalidë të përhershëm.“Klinika Emergjente e QKUK-së, njofton se bazuar në raportin gjashtëmujor të punës, vërehet shtim i rasteve që kërkojnë ndihmën mjekësore si pasojë e aksidenteve në trafik. “Gjatë periudhës së lartcekur ka pasur 763 pacientë që pas aksidenteve në trafik, kanë kërkuar ndihmën emergjente mjekësore. Bazuar në raport, 3 persona kanë vdekur pas plagëve të marra nga aksidentet”, thuhet në raport.Nga numri i përgjithshëm i të aksidentuarve, 2 për qind e atyre që kanë kërkuar ndihmën mjekësore, sipas raportit, kanë mbetur me invaliditet të përhershëm, përderisa 0.5 për qind kanë pësuar lëndime të rënda trupore që kërkojnë trajtim në periudhë më të gjatë kohore.“Qendra Klinike Universitare e Kosovës, përkatësisht Klinika Emergjente, apelon tek shoferët e automjeteve të jenë më të kujdesshëm gjatë vozitje duke i kontribuar ruajtjes së shëndetit të tyre|, thuhet në raportin e Klinikës Emergjente.Sipas të njëjtit raport, Në gjashtëmujorin e këtij viti, Klinika Emergjente ka kryer gjithsej 3.975 vizita mjekësore, prej tyre 554 pacientë të pranuar në Klinika të ndryshme në QKUK, 463 intervenime ,1.206 pacientë të reanimuar dhe 149 operacione emergjente.