Reshje të mëdha shiu, ngrihet shkalla e alarmit

Reshjet e mëdha të shiut kanë penguar qarkullimin në autostradën A1 në mes të Rothristit dhe Härkingenit. Kjo pjesë rruge, në drejtim të Bernës është bllokuar në mëngjesin e të shtunës pjesërisht nga uji, duke mbetur ende i kalueshëm vetëm njëri drejtim i saj

Reshjet e mëdha të shiut që po vazhdojnë prej dy ditësh kanë ngjallur frikën për vërshime në shumë pjesë të Zvicrës. Ujërat e fryera të lumenjve, sidomos në Zvicrën Qendrore tashmë kanë filluar të paraqesin rrezik edhe për qarkullimin rrugor dhe hekurudhor. Kështu për dy lumenjtë e mëdhenj në këtë regjion, Aare dhe Reus autoritetet kanë shpallur shkallën e rrezikshmërisë numër 3, që nënkupton rrezik të drejtpërdrejtë për vërshime.

Zjarrfikësit kanë filluar të vendosin gypa të mëdhenj gome rreth lumenjve duke ngritur kështu nivelin e brigjeve të lumenjve për të parandaluar vërshimet. Shtabi i krizës në kantonin Aargau ka apeluar te popullata që të rrijë larg brigjeve të lumenjve dhe përrojeve.

Në kantonin e Solothurnit, shirat intensive tashmë kanë vërshuar një pjesë të bodrumeve të shtëpive.

Reshjet e mëdha të shiut  kanë penguar qarkullimin në autostradën A1 në mes të Rothristit dhe Härkingenit. Kjo pjesë rruge, në drejtim të Bernës është bllokuar në mëngjesin e të shtunës  pjesërisht nga uji, duke mbetur ende i kalueshëm vetëm njëri drejtim i saj. Shpejtësia maksimale e lejuar në këtë segment rruge është 60 kilometra në orë.

Situatë e ngjashme me reshjet e shiut është duke mbretëruar edhe në Kantonin e Bernës. Edhe në këtë kanton, si pasojë e ngritjes së nivelit të ujit të lumenjve, zjarrfikësit kanë marrë masat parandaluese. Nga ora 7.20 shërbimi zjarrfikës u ka dërguar mesazhe telefonike popullatës në zonat më të rrezikuara  me kërkesën që të kontrollojnë bodrumet për shkak të rrezikut të vërshimit.

Reshjet e shiut pritet të vazhdojnë edhe sot, e shtunë dhe të dielën. Përmirësim i motit parashihet për të hënën.