Raundi i tretë i bisedimeve Kosovë-Serbi, pa rezultate

Diskutimet u përqendruan rreth çështjeve si: kartat e identitetit, pasaportat, sigurimi i veturave, patentë shoferët dhe tabelat e veturave

Pa prodhuar ndonjë rezultat konkret ka përfunduar takimi i tretë me radhë i delegacioneve të Kosovës dhe Serbisë, i cili është mbajtur në Bruksel

Sipas një komunikate të lëshuar nga Bashkimi Evropian, thuhet se fokusi kryesor i bisedimeve ishte liria e lëvizjes. “Diskutimet u përqendruan rreth disa aspekteve, siç janë: kartat e identitetit, pasaportat, sigurimi i veturave, patentë shoferët dhe tabelat e veturave”, thuhet në komunikatë.

Në këtë deklaratë, shtohet se diskutime të mëtejme do të duhen, përfshirë edhe çështjen e njohjes së diplomave universitare, e cila u shtrua si temë. Në këtë takim pala serbe ka propozuar disa zgjidhje që aplikohen mes shteteve që nuk kanë raporte normale. Është përmendur shembulli Maqedoni-Greqi, por udhëheqësja e delegacionit kosovar, Edita Tahiri, ka theksuar se Kosova insiston në zbatimin e reciprocitetit për çdo zgjidhje.

“Ne i kemi marrë si propozime të tyre dhe do t’i analizojmë dhe në faza të tjera do të japim mendimin tonë për to. Mirëpo me rëndësi është fakti se të dyja vendet duan sa më shpejt të bëhen pjesë të BE-së, atëherë, gjithsesi pritet që Serbia të bëjë avancime në kuptim edhe të filozofisë politike për të vënë në praktikë vlerat dhe parimet evropiane”, tha Tahiri.