Shqipëria

Qeveria në Shqipëri mbulon 70 për qind të kostos për ata që instalojnë panele diellore

70 për qind të kostos Qeveria shqiptare jep për familjet që instalojnë panele diellore për ngrohjen e ujit, nisin aplikimet

Referuar situatës së vështirë energjetike, me të cilën po përballet Shqipëria dhe Europa, dhe në përputhje me Strategjinë Kombëtarë të Energjisë dhe Planin Kombëtar për Energjinë dhe Klimën, janë parashikuar skema nxitëse për reduktimin e konsumit të energjisë elektrike për abonentët familjarë, përcjell albinfo.ch.

Në një njoftim, Ministria e Infrastrukturës dhe Energjisë ka nisur zbatimin e programit për subvencionim me 70 për qind të shumës për çdo familje që do të aplikojë për një njësi diellore për ngrohjen e ujit.

Skema për nxitjen e përdorimit të paneleve diellore për ngrohjen e ujit nga konsumatorët familjarë synon subvencionimin deri në masën 70 për qind të kostos nga Agjencia për Efiçencën e Energjisë.

Ministria bëri të ditur se është çelur thirrja për aplikim për subjektet tregtuese për ofrimin e panele diellore për ngrohjen e ujit për konsumatorë familjarë

Sipas ministrisë, kjo masë synon reduktimin e konsumit të energjisë elektrike dhe përmirësimi i furnizmit me ujë të ngrohtë sanitar; reduktimin e emetimeve të CO2.

MIE informon se konsumatorët familjarë duke ngrohur ujin përmes paneleve diellore kursejnë 20 për qind nga fatura e tyre.

Kjo është thirrja e parë për aplikim, e cila u drejtohet subjekteve tregtuese të interesuara për ofrimin e shërbimit të shitjes dhe instalimit të paneleve diellore për ngrohjen e ujit për 2000 (dy mijë) konsumatorë familjarë, të cilët do të përzgjidhen për të përfituar nga kjo skemë mbështetëse.

Konsumatorët familjarë që do të aplikojnë për përfitim mase mbështetëse do të mund të marrin shërbimin vetëm në një nga subjektet e publikuara nga Agjencia e Eficencës së Energjisë.


LAJME INTERESANTE NGA INTERNETI